Unibertsitateko titulazioa duen pertsona baten prestakuntza praktikorako beka, Kanpo Ekintzarako Zuzendaritza Nagusian

21/04/2026

24E/2026 FORU AGINDUA, martxoaren 17koa, Memoria eta Bizikidetzako, Kanpo Ekintzako eta Euskarako kontseilariak emana, zeinaren bidez prestakuntza beka honetarako deialdiaren oinarriak onesten baitira: "Unibertsitateko titulazioa duen pertsona baten prestakuntza praktikorako beka, Kanpo Ekintzarako Zuzendaritza Nagusian eta Nafarroako Gobernuaren Bruselako Bulegoan aritzeko"

Helburuak.

–Gazteek kanpo ekintzaren arloan duten prestakuntza sustatzea.

–Ezagutzak hobetzea, hala Europar Batasunaren esparrukoak nola arlo praktikokoak, Kanpo Ekintzarako Zuzendaritza Nagusian.

–Europar Batasuneko instituzioen funtzionamenduari buruzko eta haren politikei eta ekintzei buruzko ezagutza hobetzea.

–Bai Kanpo Ekintzarako Zuzendaritza Nagusian, bai Bruselako Bulegoan, ohiko lanetan parte hartzea eta zeregin teknikoetan laguntzea: informazioa bilatzea eta materiala eta dokumentazioa prestatzea, Europar Batasuneko instituzio eta organoen bilera edo biltzarretara joatea eta txostenak, buletinak eta abar prestatzen laguntzea.

–Nafarroa Europar Batasunaren barruan egoteak dakarren guztiari buruzko ezagutza praktiko zabala sendotzea.

Bekaren iraupena.

Beka hasiko da hura emateko ebazpenean ezartzen den egunean. Aurreikusten da 2026ko maiatzean hastea eta urtebete geroago bukatzea, eta luzatzen ahalko da urtebeteko epeetan, gehienez ere hiru urte egin arte, hasierako aldia eta luzapenak kontuan harturik. Luzapenerako baldintza izanen da aurrekontuetan horretarako kreditu erabilgarri nahikoa egotea.

Hartzaileek bete beharreko baldintzak.

1. Adinez nagusia izatea.

2. Espainiako nazionalitatea izatea, edo Europar Batasuneko estatu bateko herritartasuna izatea. Nolanahi ere, Espainiako nazionalitatea ez duenak gaztelaniaz behar adina badakiela frogatu beharko du, Hizkuntzetarako Europako Erreferentzia Esparru Bateratuaren arabera C1 mailaren baliokidea den titulu ofizial batekin egiaztatuta.

3. Jarduteko gaitasun osoa izatea eta Nafarroako Foru Komunitateko Administrazioaren eta haren erakunde autonomoen laguntza eta dirulaguntza publikoak jasotzeko desgaitua ez egotea.

4. Bizitokia Nafarroan izatea, deialdia argitaratu baino urte bat lehenagotik gutxienez.

5. Unibertsitateko gradudun edo lizentziadun titulu ofizial bat izatea, edo eskaerak aurkezteko epea bukatzen den egunean titulu hori eskuratzeko moduan egotea. Atzerrian emandako tituluen kasuan, hezkuntza arloan eskumena duen ministerioaren homologazioa aurkeztu beharko da.

6. Titulu hori eskuratua izatea prestakuntza beka honen deialdia egin aurreko hiru urteen barrenean.

7. C1 mailako ingeles edo frantses maila dutela frogatzea, titulu ofizial baten bidez, Hizkuntzetarako Europako Erreferentzia Esparru Bateratuaren arabera (HEEEB).

8. 30 urtetik beherakoa izatea.

9. Ez izatea ezintasun fisikorik edo gaixotasunik, bekaren xedeko prestakuntzan aritzea galarazten dionik.

10. Nafarroako Foru Komunitateko Administrazioan edo haren erakunde autonomoren batean prestakuntza bekarik jaso ez izana bi urterako edo gehiagorako.

Eskaerak aurkezteko epea.

Eskaerak aurkezteko epea hilabetekoa izanen da. Deialdi hau Nafarroako Aldizkari Ofizialean argitaratu eta biharamunean hasiko da, eta bukatuko da, epea mugara iristen den hilaren barnean, argitaratze-egunaren zenbaki bera duen egunean.